南粵急行

網站廿周年感言

人生無幾多個十年,更加無幾多個廿年(廢話),轉眼間南粵急行就迎來廿周年紀念。當年嘅「小弟」,現在都已經成為「老編」喇。

南粵急行嘅第一個十年,對香港嘅鐵路界嚟講,係多姿多彩嘅:千億鐵路計劃、兩鐵合併,每個歷史時刻,都係印象難忘嘅。但係過去呢十年,尤其係近兩三年,似乎就係滿佈污點嘅十年,由故障當食飯、出軌炒車、豆腐渣新綫,到高鐵一地兩檢、甚至捲入今年嘅政治風暴後,被不少市民唾棄,以往令香港人感到自豪、號稱「世界級」嘅鐵路系統,似乎唔知去咗邊度。

呢十年網絡世界同樣變咗好多,社交網絡堀起,某程度上取代咗自架網站以及討論區,當中有不少「鐵路KOL」成功將鐵路相關嘅資訊帶去鐵路迷圈子以外嘅人群中,甚至成為社會熱話,老編係相當欣賞嘅,而南粵急行亦有跟隨呢個轉變,「業務」重心由網站轉到社交網絡,但網站亦有其不可取代嘅功能,所以係會繼續存在落去嘅。

呢一年無論由香港、到鐵路系統、定係老編自己,都患咗一場大病,老編就謹此寄望一切都能夠好似某司長隻手咁,「一定會好起來的」 #係咪呀哈姆太郎

新嘅一年,為慶祝南粵急行廿周年,老編亦都初步構思咗幾個新搞作,不過視乎身體狀態,做到幾多就幾多,大家可以俾少少期待,不過唔需要太期待(笑)

最後,好老土但係一定要講,非常感激大家支持咗老編咁多年,南粵急行嘅口碑(如果有,除非無)係全靠大家俾嘅。